Farstad Shipping sitt offshore-skip Far Sigma ligg no i opplag på Humla i Ålesund. Torsdag ettermiddag eller kveld kjem også Far Sagaris til Humla, og etter planen kjem Far Statesman fredag morgon.
– Her skal båtane ligge til vi ser ei betring i marknaden, seier finansdirektør Torstein Stavseng i Farstad Shipping i Ålesund.
Rundt 100 av mannskapet har fått permitteringsvarsel, absolutt dei fleste er norske. På båtane blir det ei minimumsbemanning som sørgjer for vakthald og vedlikehald.
Dei tre båtane er ankerhandteringsfartøy, som primært er brukt til leiteaktivet på sokkelen. Båtane er brukt til flytting av ankersystem og sleping av riggar. Oljeselskapa tonar ned denne delen av aktiviteten raskt når oljeprisen er blitt så lav.
Les også: – Det er alvorlig når nærmere 100 mann blir permittert
Nært
– Vi har valt Humla fordi vi ønskjer å ha båtane så nær Ålesund som muleg, og å ha dei tre båtane samla. På Humla er det fasilitetar som trengst, slik som straum, seier Stavseng.
Han reknar med skipa blir liggande ei stund.
– Når vi går til dette skrittet, er det fordi vi trur det vil vare ei stund. Men kor lenge vil blant anna vere avhengig av marknadsutviklinga. Dersom marknaden blomstrar opp, vil vi ikkje sitje og sjå på det – men det er ikkje dét vi trur vil skje med det første, seier Stavseng.
Desse tre skipa er søsterskip med same design. Far Sigma vart levert frå verftet så seint som februar i fjor.
Les også: I Far Sigma ser du summen av lokal teknologi
Leiteboring
Onsdag fall prisen på nordsjøolje til under 50 dollar fatet. Det er ei halvering på tre månader. Ei rekke oljeselskap varslar at dei vil kutte kostnader og dempe aktiviteten.
Den amerikanske investeringsbanken Evercore har sjekka planane til 300 olje- og gasselskap verda over. Trass forventningar til auka investeringar i Afrika og Midtausten, trur banken at utgiftene til leiting og produksjon vil falle mellom 10 og 15 prosent på verdsbasis.
– I det korte bildet er det lite trøst å finne i andre delar av verda, seier finansdirektør Torstein Stavseng. Dei har varsla opplag for til saman tre offshore-skip i Nordsjøen, og permittering av rundt 100 tilsette. Han ser ikkje bort frå at dei må legge fleire skip i opplag i år.
Les nyheiter frå næringslivet på smp.no
Ingen fleire så langt
Sunnmørsposten har denne veka snakka med 11 reiarlag på Sunnmøre. Tre av dei har varsla at dei vil legge til saman fem skip i opplag. Bourbon Offshore varslar at dei vil legge ein supplybåt i opplag, og permittere 25 tilsette. Tidlegare har Island Offshore i Ulsteinvik varsla opplag og permittering av 41 tilsette. Les også: Har permittert tilsette på «flaggskip»
Ingen av dei andre reiarane sa at dei planlegg å legge skip i opplag. Det er særleg ankerhandteringsskip (AHTS) og forsyningsskip (PSV) som er ramma av svikten i marknaden.
Spotmarknaden
I den kortsiktige spotmarknaden blir fleire båtar drifta vidare med tap.
– Spotmarknaden er berre sorga for augneblinken, den går til under crew-kost, ifølgje fraktsjef Hallgeir Reitan hos Island Offshore.
Det er meir enn 220 skip i offsshore-reiarlaga på Sunnmøre. Litt over 30 av desse er i den kortsiktige spotmarknaden, der ein i gode tider kan tene veldig gode pengar. No går altså fleire med tap.
Skiferolje
Skipsmeklar Anders Engeset i Fearnley Offshore Supply ønskjer ikkje spå.
– Det viktigaste er at det er vanskeleg å seie noko om 2015 etter nokre få dagar ute i det nye året. Men med den oljeprisen vi har no, kan det bli tøft, seier Engeset.
Bortfall av forventa aktivitet i Russland gjer ikkje situasjonen meir positiv for nordsjømarknaden.
Globalt er det ingen oljeselskap som ser ut til å ville redusere oljeproduksjonen for å få opp prisen. Men I USA er det mange små selskap innan skiferolje. Det er ikkje sikkert dei har nok cash til å køyre vidare på så lav oljepris.
– Det kan fort bli ein reell reduksjon i produksjonen der. For det er ikkje nødvendigvis slik at folk står klare til å overta, seier Engeset.