Ålesund har vore med på å utarbeide eit nasjonalt vegkart for smarte byar og lokalsamfunn saman med Bergen, Bodø, Asker, Fredrikstad, Narvik, Stavanger og Trondheim. Vegkartet vart lansert under eit arrangement i Arendal sist veke. No startar den viktige, men krevjande jobben med å gjere ord til handling. Alle innbyggarane bør bli involverte i arbeidet, både i form av grundig informasjon, og ved at kommunen lytter til innbyggarane sine synspunkt og forslag til meir berekraftig samfunnsutvikling.

Vegkartet er basert på åtte prinsipp som skal hjelpe kommunar og fylkeskommunar med å arbeide mot eit felles mål, som kort fortalt handlar om å berge kloden vår. Dersom vi skal klare å oppnå FNs berekraftsmål, må alle bidra. Kommunane har ansvar for å utvikle gode tenestetilbod, og må gjere det lettare for innbyggarane å velje miljøvenlege løysingar. Stavanger vart nyleg kåra til Norges elbil-hovudstad 2019 for kommunens offensive satsing på nye ladepunkt, og har dessutan fått heider for arbeidet med å utvikle effektive kollektivtilbod.

Kommunar er forskjellige, har unike mulegheiter og utfordringar. Bodø har gjennomført jobbskapingsprosjekt, og Ålesund har mellom anna fått i stand eit unikt samarbeid med NTNU og Offshore Simulator Centre, som kan bli nyttig for alle kommunar. Eit viktig mål med smartbyprosjektet er at kommunane skal lære av kvarandre, utveksle erfaringar, inspirere og utfordre. Alle kommunar kan ha nytte av guiden for smarte lokalsamfunn, ikkje berre pilotkommunane i prosjektarbeidet. Kommunane kan til dømes stille miljøkrav til leverandørar, og på den måten bidra til innovasjon og grønare løysingar.

I samband med etableringa av nye Ålesund kommune er det gode mulegheiter for tenke nytt, og prioritere klima og miljø når et gjeld utforming av tenestetilbod, både innanfor samferdsel, helse og næringsliv. Eit nøkkelspørsmål er korleis ny teknologi kan vere med på å utnytte ressursane på ein betre måte, både lokalt og globalt. Vi meiner det er positivt at Ålesund har tatt ei aktiv rolle i dette nybrottsarbeidet. Dess fleire som engasjerer seg, dess større er sjansen for at resultatet blir meir attraktive, inkluderande og klimavenlege lokalsamfunn.