Tjukk tåke hindra ferjene i å legge til kai på Hareid fredag føremiddag. I rundt halvannan time låg alle ferjene tåkefast på fjorden utanfor Hareid.
Matros Gunder Moldvær på «Tidefjord» fortel til smp.no at han har vore på dette ferjesambandet i 17 år, men at han aldri har opplevd så ekstrem tåke her tidlegare.
«Tidefjord» skulle ha vore på Hareid klokka 09.30 men la til kai først klokka 11.10. 10 minutt seinare hadde alle dei tre ferjene kome seg inn til land.
– Aldri opplevd liknande
Yrkessjåfør Fredrick Egge Eimstad hadde ved 10.45-tida vore ein time og eitt kvarter om bord i «Tidefjord» på grunn av tåketrøbbelet.
Han har aldri opplevd liknande.
– Det er veldig dårleg sikt. Ferjemannskapet har opplyst at dei må vente til dei ser moloen. Vi har fått god informasjon undervegs, presiserer han.
Han anslår at «Tidefjord» er halvfull med køyretøy.
Gratis kaffi
Klokka 10.35, etter meir enn ein times ventetid ute på fjorden, fortalde ferjepassasjer Jan Lennart Auning at tåka kunne sjå ut til å lette litt.
Auning foralde at passasjerane får gratis kaffi i ventetida.
– Gratis sveler då?
– Det har dei ikkje bode på.
Lokal tåke
– Tåka er veldig lokal, det er eit veldig lite område på ytre søre som har tåke, seier meteorolog Geir Ottar Fagerlid hos Vervarslinga på Vestlandet til smp.no.
– Det er vanskeleg å seie, men eg trur tåka kan bli liggande nokre timar. Vi får håpe at sola tar tak i den etter kvart, sa Fagerlid vidare i 10.30-tida.
Sikt
Ifølgje Inge Andre Utåker i Norled var sikten truleg mindre enn 20 meter like før klokka 10.
– Då «Ullensvang» gjekk inn i hamna, så såg dei ikkje moloen, seier Utåker.
– Dei bruker sjølvsagt radar, men med så dårleg sikt er sikkerheitsmarginane for små, seier Utåker vidare.
Ferjesambandet er no stengt inntil vidare, opplyste Norled klokka 10.13.