Midt i alle meldingar om nedskjeringar varsla hurtigbåt-byggjaren Brødrene Aa nyleg at dei treng fleire folk. No har dei selt 40 prosent av aksjane til Hong Kong.
Brødrene Aa etablerer samtidig eit selskap i Hong Kong som skal ta hand om marknadsføring, sal og utvikling i Asia. Dei vil også etablere eit nytt skipsverft i Kina.
Brødrene Aa har spesialisert seg på hurtigbåtar med skrog i karbonfiber-kompositt. Kjøparen, CKSE, er operatør for rundt 50 passasjer-hurtigbåtar i Hong Kong og fastlands-Kina, opplyser Brødrene Aa i ei pressemelding.
Styrke
Samarbeidet er allereie i gang, med bygging av to katamaranar på 41 meter.
- Transaksjonen beviser styrken i Brødrene Aa-teknologien og kunnskapen og kompetansen i selskapet, skriv selskapet i ei pressemelding.
Brødrene Aa har hittil vore 100 prosent eigd av lokale eigarar i Hyen og nærområdet i Nordfjord. Neste år skal selskapet levere dei nye hurtigbåtane til rutene Ålesund-Hareid, Molde-Vestenes og Ålesund-Langevåg. Brødrene Aa samarbeidar også med ABB om batteridriven og nærast lydlaus framdrift av båtar.
