I år er «kunstivalen» Go With the Flø for første gong konsentrert på ein dag. Slik skal det bli lettare å få med seg alt for folk som kjem langvegsfrå.
– Eg trur det skal bli veldig bra. Det blir intensivt, heile dagen, seier Hugo Opdal.
Det skjer-kalenderen: Få med deg alt som skjer på Nordvestlandet
Parkour
Tyske Amadei Weiland, kjend som «Urban Amadei», er rekna som ein av verdas fremste parkour-kunstnarar. Med spenst og muskelstyrke kjem han seg imponerande lett over ulike hinder. Filmar på YouTube viser korleis 26-åringen spring oppover vegger, hoppar over murar og tek saltoar.
– Dette er kroppskunst, og det er gøy å sjå på. Han spring på betongvegger i New York og Berlin. Slikt har vi ikkje her, men vi har mykje anna som han kan bruke, seier Opdal.
Nattklubb i gymsal
Aktivitetane på programmet er nøye utvalde og skal utgjere ein god miks, som heng saman.
Kontrasten er stor mellom utandørs kroppskunst til nattklubb, midt på dagen, i gymsalen på Flø. Her opptrer artisten Brede Rørstad, som er frå Valderøya, men bur i Paris.
– Dette blir tøft. Han leiker med former, og det blir litt alternativt, fortel Opdal om nattklubb-konserten i gymsalen.
(saka held fram under)
Utstilling
Etter å ha stilt ut verdsstjerner som Elmgreen & Dragset, Bjarne Melgaard og Damien Hirst, går Go With the Flø i år motsett veg. I Studio Hugo Opdal får sju unge kunstnarar vise kunsten sin.
– Det er utfordrande tider i området, og dette er ikkje året for å dra inn ein kunstnar frå Tokyo, seier Opdal.
I staden gler han seg over å kunne gi unge kunstnarar ein sjanse til å vise seg fram.
– Dette er framtidige kunststjerner, og alle må begynne ein plass. Denne utstillinga kjem til å bli rå, seier han og legg til at utstillinga heng saman med resten av programmet.
Limotur for Pushwagner Flø går mot straumen i Bygde-Norge
Gratis
Det blir i år gratis inngang til aktivitetane, noko som er mogleg takka vere sponsing. Og Opdal meiner det er viktig med Go With the Flø i år, når det er nedgangstider.
– Når det er full fest i næringslivet, er det nok kake, seier Opdal som skildrar seg som kunstmisjonær.
Han ønskjer å bringe kunst og kulturopplevingar ut i distriktet, slik at folk her skal få same opplevingane som ein kan få i urbane strøk.