Sjøholt DPS er eit tilbod til personar som bur i området og dekkjer kommunane Haram, Skodje, Ørskog, Stordal, Norddal, Stranda, Sykkylven og Ålesund, midtre bydel.
Ørskog Arbeidarpartilag kan ikkje akseptere at føretaket bygg ned pasienttilbod når satsingsområdet for spesialisthelsetenesta er å ha ein større vekst for behandling av psykisk sjuke menneske. Hausten 2018 vart det sett søkelys på den sårbare situasjonen som mange psykiatriske pasientar er i.
I nasjonale føringar vart det bestemt at psykiatrien skulle styrkast. Med nedskjeringane i Sjøholt DPS, kan vi risikere at pasientar med for kort liggetid i psykiatriske avdelingar, kjem i risikosona for eige liv og eiga helse.
Kompetansen i eit distriktspsykiatrisk senter er eit fagleg tyngdepunkt lokalt. Utgangspunktet for dei distriktspsykiatriske sentra er å vere tett på pasientane, til deira nærmiljø og det lokale tenestetilbodet.
Ørskog Arbeidarpartilag vil ikkje at pasientane og dei tilsette på Sjøholt DPS skal ofrast for å kunne redusere 200 årsverk i føretaket.
Vi må ta tilbake grunnverdiane i helsevesenet, omsorg, pleie og fokuset på faget og det å gi best mogleg behandling til pasientane.
Vi treng eit helsevesen der politikk og fag spelar på same lag og der god pasientbehandling står i sentrum.