Klimamøtet i Polen har kome delvis i skuggen av dei kraftige demonstrasjonane i Frankrike siste tida. Demonstrasjonane starta som eit raseri mot høgare prisar på bensin og svekka levekår. Opptøyane viser at det vil bli alt anna enn enkelt for politikarar å gjennomføre upopulære, men nødvendige tiltak i åra framover. Alvoret i situasjonen kom klart fram i rapporten frå FNs klimapanel som vart lagt fram i haust. Den viser at den globale oppvarminga må avgrensast til 1,5 grader – i staden for 2 grader – for å unngå katastrofale konsekvensar. I dag styrer verda mot oppvarming på tre grader. Skal vi klare å snu utviklinga, betyr det i praksis at verdas klimautslepp må reduserast med 45 prosent innan 2030.