Det er Plany AS som har utvikla den nye typen rulleport til bruk i skutesida der subsea-skip sjøset fjernstyrte undervassfartøy (ROV).
«I forhold til andre portløysingar som blir brukte i dag har Plany sin rulleport mange fortrinn, som god motstandsdyktigheit mot vind og bølgjer, lågt støynivå og redusert behov for vedlikehald» heiter det i ei pressemelding.
Kombinasjon
– Ved å kombinere Plany si spesialkompetanse på tekniske tekstilar og Aukra Maritime si kompetanse innan hydraulikk og stålkonstruksjonar, gir samarbeidet det beste grunnlaget for å levere og vidareutvikle den unike Plany rulleporten, seier administrerande direktør i Plany, Gunnar Larsen.
Les også: Plany fyller opp ordrebøkene
Lønsamt
Dagleg leiar i Aukra Maritime, Per Arne Rindarøy, seier i pressemeldinga at samarbeidet med Plany utfyller produktspekteret dei har på portløysingar, og har tru på at samarbeidet skal bli lønsamt både for dei to bedriftene og for kundane – som no får endå fleire gode produkt å velje mellom.
Les også: Treng fleire tilsette etter rekordordre
Havbruk
Plany AS har 18 fast tilsette, og held til i Gursken i Sande kommune. Bedrifta skaper lønsame løysingar til havbruk, landbruk og maritim industri, både i Norge og internasjonalt.
Aukra Maritime AS har 17 tilsette. Bedrifta er produsent av marine kraner, dekkshandteringsutstyr, lukesystem og davitar.