Ho er redaktør og dagleg leiar i avisa Nyss, som kjem ut i Sykkylven og Stranda. Sunnmørsposten sine mange aviser på Nordvestlandet hadde alle opplagsauke i 2022, men ingen hadde større prosentvis vekst enn nettopp avisa Nyss.
Nyss såg dagens lys i januar 2021, etter at avisene Sunnmøringen og Sykkylvsbladet vart slått saman. Nyss hadde i fjor ein opplagsvekst 169, ein vekst på 4,46 prosent.
Lim og lupe – og eit nettbrett
Pluss over alt
Og vekst var det altså over heile linja for dei mange avisene Sunnmørsposten eig på Nordvestlandet.
Vikebladet Vestposten auka opplaget med 82, Møre-Nytt fekk 24 i pluss, Fjordingen hadde nøyaktig same auke, Fjordenes Tidende noterte seg for ein pluss på 48, Fjordabladet fekk ein auke på 36, Vestlandsnytt hadde pluss 30 – medan Sunnmørsposten sjølv fekk ein opplagsvekst på 191 i fjor – og no er oppe i eit samla opplag på 27.025.
Omgrepet «netto opplag» er summen av papirabonnentar, digitale abonnentar og laussal.
Limet i bygdene
– Nesten alle våre aviser i Sunnmørsposten-konsernet hadde vekst, med to unntak. Men vi har tru på at det vil endre seg til pluss igjen der også, seier Frank Støyva Emblem. Han er direktør for lokale mediehus i Sunnmørsposten.
For Sunnmørsposten eig også tre lokalaviser på Austlandet: Dølen, Fjuken og Vigga. Dølen auka opplaget, medan Fjuken og Vigga gjekk tilbake.
– Opplagstala som kom denne veka viser at det blir jobba godt rundt om i avisene, og at lesarane vil ha produkta våre. Lokalavisene er på mange måtar limet i bygdene, og spelar difor ei kjempeviktig rolle, meiner direktøren.
Stadig kursing av tilsette
– Korleis skal avisene halde på lesarane, og også skaffe seg nye?
– Det skal ikkje minst skje gjennom kompetanseheving hos dei tilsette. Vi har stadig kursing av våre folk. Vi har også fått på plass nye dataverktøy, og skal bli endå betre på nettet. Det er der veksten kjem.
– Betyr det færre papiraviser?
– Det er ikkje noko vi diskuterer no. Så det er i så fall ikkje noko som kjem med det første.
Vellukka samanslåing
I hovudredaksjonen til Nyss i Sykkylven sit redaktør Monica Aure Fallingen og konkluderer med at samanslåinga av dei to avisene i Stranda og Sykkylven gjekk som dei håpte på: det vart enda fleire lesarar.
– Det var ein vinn-vinn situasjon. Lesarane av Sunnmøringen hadde berre ei papiravisa i veka og små ressursar – men dei hadde ei nettside. I Sykkylven hadde vi fleire tilsette, to aviser i veka – men inga nettside.
Nyss-redaktøren seier det er svært tilfredsstillande at dei no kan publisere nyheitene på nettsida si straks det skjer noko, og ikkje vente til neste papiravis.
Tett på heile tida
– Det er ei heilt ny verd for oss. No kan vi vere tett på heile tida. Men like fullt så er vi framleis svært glade i papiravisa vår, seier Monica Aure Fallingen.
– Nyss har ein dyktig og framoverlent stab som legg ned ein kjempeinnsats for at lesarane våre skal få gode saker og siste nytt. Opplagsveksten seier meg at lesarane set pris på dette. Det er kjekt å registrere at alt det gode arbeidet som vert gjort ber frukter.
Netto opplag – Smp-konsern:
Sunnmørposten: 27.025. +191.
Vikebladet Vestposten: 4576. +82.
Møre-Nytt: 5060. +24.
Nyss: 3955. +169.
Fjordingen: 3902. +24.
Fjordenes Tidende: 4635. +48.
Fjordabladet: 3172. +36.
Vestlandsnytt: 4628. +30.
Dølen: 4469. +16.
Fjuken: 3805. −5.
Vigga: 2292. −110.
Totalt hadde dermed avisen i Sunnmørsposten sitt konsern eit samla opplag på 67.519. +505.