Fylkesrådmannen i Sogn og Fjordane vil i dag legge fram si tilrådiing om fylkeskommunen bør selje aksjane sine i Fjord1 eller ikkje, skriv NRK Sogn og Fjordane. Fylket har aksjonærfleirtal i Fjord1.
Fylket sine konsulentar har i eit lukka møte i fylkesutvalet foreslått at fylket sel aksjane sine til Torghatten-konsernet i Brønnøysund, ifølgje avisa Firda.
Om det skjer, har Sævik ikkje tenkt å gje seg utan kamp.
– Vi aktar å bruke forkjøpsretten vår. Dersom fylkeskommunen neglisjerer dette, vil saka gå til retten, om naudsynt heilt til Høgsterett, seier Per Sævik til NRK Sogn og Fjordane.
Rådmannen ikkje sikker
Til Sunnmørsposten seier fylkesrådmann Tore Eriksen at det ikkje er sikkert tilrådinga hans blir klar i dag, men at dette er målet.
Saka kjem etter planen opp i fylkesutvalet 16. november.
Sævik-familien eig 41 prosent av Fjord1-aksjane gjennom Havilafjord AS. Sogn og Fjordane fylkeskommune eig 59 prosent.
Har kjempa før
Sævik-familien sitt tradisjonsrike reiarlag Havila AS kjøpte i 2011 Møre og Romsdal fylke sine aksjar i Fjord1. Dette skjedde i kamp med to andre ferjeselskap, Torghatten og Tide. Torghatten og Tide ville også kjøpe Sogn og Fjordane sine aksjar, men Sogn og Fjordane avviste sal.
No meiner altså Sævik at han har forkjøpsrett dersom Sogn og Fjordane fylkeskommune vil selje sine aksjar.
Fjord1 har dei siste åra hatt ei omsetning på rundt 2,3 milliardar kroner, og gjekk i fjor med eit overskot på nesten 100 mill. kroner.