Arbeidet med å byggje ny ferjekai og oppstillingsareal på Sulesund er godt i gang.
Oppstart var 1. september og førebels er det grunnarbeid entreprenøren driv med:
- Dei siste vekene er det utført sprengingsarbeid tett mot trafikkert veg, og difor har arbeidet blitt tilpassa ferjeavgangane. Steinen som blir sprengt ut - til no 14.000 kubikkmenter, blir brukt til å lage ei fylling i sjøen, går det fram av ei pressemelding frå Statens vegvesen.
- Ferjetrafikken har gått som normalt, og ein har forlenga oppstillingsfilene mellombels med rundt 120 meter austover mot Sulavegen, heiter det vidare.
Slik påvirker anleggsarbeidet deg som trafikant
Sprengingsarbeidet ved oppstillingsplassen for ferjekøa er venta å vere ferdig før jul, og då skal entreprenøren halde fram med sprenging i sjøen. Etter nyttår startar ein vidare med betongarbeid for landkaret, og i februar skal ein gjere pelearbeid frå flåte. Nærmare våren blir maskinene flytta opp i fjellsida for å lage rasvollar.
Arbeidet skal vere ferdig 1. januar 2019. Då kjem det tre nye elektriske ferjer på sambandet Sulesund - Hareid.