Dette seier fagleiar for tilsyn i Statens vegvesen, Rune Granum til Sunnmørsposten. Det var NRK som først skreiv om saka, som handlar om Langvatn Trafikkskule i Volda. Nokre dagar før melde NRK om ei anna sak, der køyrelærarar, mellom anna i Førde og Stryn, skal vere tekne i å jukse ved å gje kvarandre personleg førarkompetanse dei ikkje har gjennomført.
Tips – og infiltrasjon
Saka i Volda er avdekt på grunnlag av tips, og personar frå Statens vegvesen som har infiltrert kursa. Seksjonsleiar Rune Granum i Statens vegvesen seier seg på dette grunnlag heilt sikker på at det skal vere gjennomført til dels omfattande juks ved køyreskulen i Volda.
– Vi har hatt våre folk inne på kurs der og vi er sikre i vår sak. Difor vart det også ein slik reaksjon frå vår side.
– Vi har elles ikkje gått aktivt ut med denne informasjonen, men når det no kjem opp i media så vil jo saka svi endå hardare, vurderer Granum.
– Feilrapportert opplæring
Granum seier at åtte månaders inndraging av opplæringsretten uansett er ein svært streng reaksjon frå Statens vegvesen.
– Opplæringa av unge, ferske yrkessjåførar er ikkje fullført i tråd med regelverk og i samsvar med innmelde rapportar.
– Derimot var vi langt meir usikre på om vi skulle gå inn og underkjenne papira til dei som uskuldig har gjennomført opplæringa si på sviktande grunnlag, seier Granum.
– Kva vart konklusjonen?
– Vi landa på at det var uråd å kunne dokumentere at alle var i lik situasjon. Og alle har trass alt gjennomført teoretiske prøver som er godkjende av oss. Difor får dei behalde papira sine, fortel Granum.
– Dei du møter i store bilar
– Kva er verst med ei slik sak?
– Vi vil alle kjenne oss trygge på at dei som fraktar oss i store bussar, dei vi møter bak rattet i storbilar og alle som får ansvar for slike store krefter i trafikken, skal vere best muleg rusta.
– I dette tilfellet gjeld det i stor grad heilt unge og ferske sjåførar, seier Rune Granum.
NRK har fått denne korte kommentaren frå innehavaren av Langvatn Trafikkskule: «Vedtaket er påklage. Ut over dette har ikkje trafikkskolen kommentar.»
Sunnmørsposten har heller ikkje fått svar.
Anna køyreopplæring ved trafikkskulen i Volda er ikkje råka.
