Tysdag hadde Statens vegvesen storbilkontroll på Kjøs kontrollplass i Volda kommune. I alt 110 tunge køyretøy vart kontrollerte, og resultatet vart to bruksforbod, skriftlege manglar til sju køyretøy, to sjåførar med brot på køyre- og kviletid og eit ADR-køyretøy (farleg gods) med brot.
Under kontrollen vart følgande avdekka:
Eit køyretøy fekk teknisk mangel for sprekk i frontruta. I tillegg fekk sjåføren åtvaring for brot på køyre- og kviletidsregelverket.
Eit køyretøy lasta med fisk fekk køyreforbod til det slutta å renne fiskevatn frå godsrommet.
Eit køyretøy fekk teknisk mangel for skade på karosseriet.
Eit vogntog som vart stoppa for kontroll hadde montert kufangar. Dette er utstyr som skal godkjennast, og køyretøyet må visast på trafikkstasjonen for godkjenning. Det vart i tillegg gitt teknisk mangel for skade på sidehinderet på tilhengaren.
Eit vogntog som utførte midlertidig kabotasje fekk bruksforbod grunna manglande opplysningar i fraktbrevet. Vidare fekk føraren åtvaring grunna brot på køyre- og kviletidsregelverket, og det vart også gitt teknisk mangel grunna sprekk i frontruta.
Eit køyretøy fekk teknisk mangel grunna stor ripe i frontruta, noko som skuldast defekt viskarblad.
Eit køyretøy fekk teknisk mangel grunna skade og lause deksel rundt ei lykt, noko som kan auke faren for personskade ved ei eventuell påkøyring.
Eit vogntog som transporterte farleg gods (ADR) fekk påbod om å skifte eit oransje skilt der farenummer og UN-nummer var slitte.