– Her har eg fått jobb som arealplanleggjar i Sørum kommune. Eg tek til i den nye jobben i midten av oktober, fortel Ketil Matvik Foldal (43). Han flyttar for å kome nærare kjærasten.

Ørstingen, som er utdanna geograf, tok til som saksbehandlar hos Fylkesmannen i Møre og Romsdal i januar 2002. Allereie i desember året etter var han blitt ny beredskapssjef i fylket.

Fylkesberedskapssjefen samordnar arbeidet med samfunnstryggleik, både i ein normalsituasjon og når uønskte situasjonar oppstår. Oppfølging og rettleiing av kommunane er også ein viktig del av jobben.

Dramatikk

Og det har vore nokre uønskte situasjonar, der 22. juli-terroren i 2011, Fjelltun-raset i 2008 og orkanen «Dagmar» i 2011 alle sit godt fast i minnet til 43-åringen.

– I tillegg hadde vi ein dramatisk situasjon på ytre søre Sunnmøre i september 2007 som mange kanskje har gløymd. Då var regionen utan telesamband ein heil dag.

– Heldigvis unngjekk vi brannar, alvorlege trafikkulykker og hjartestans den dagen, seier Ketil Matvik Foldal.

Han har altså dei siste 12 åra hatt ein jobb som handlar om å ta utgangspunkt i alt som kan gå gale, og bu seg på å handtere dette – anten det er flodbølgje i Storfjorden, fjellras i Romsdalen eller orkan på kysten.

Det meste fungerer.

– Kan ein ikkje bli deprimert og søvnlaus av å tenke på alt som kan gå gale?

– Det har hendt at eg har lege vaken og grubla litt. Samtidig har eg hatt ein særs meiningsfull jobb, og ein jobb der ein ser kor godt det meste fungerer når noko skjer, kor mange flinke folk det er som trør til og gjer ein solid innsats når det trengst.

– Men det er vel ikkje alltid at beredskapen fungerer?

– Eg synest det ofte blir fokusert for mykje på kva som ikkje går etter planen. Det meste fungerer, men det blir ofte ikkje nemnd.

I fritida pleier ørstingen ein litt uvanleg hobby: Han samlar på kommunar i Norge, ved at han let seg avbilde saman med kommuneskiltet. Han sikra seg Træna i sommar, og har dermed berre fire igjen: Utsira, Kvitsøy, Bykle og Valle.

Og han starta før vi fekk fleire kommunesamanslåingar, så han har til no vore i 431 kommunar.