Det skriv nett.no.
Striden om teknologien står mellom Aker Biomarine og Rimfrost, men før saka kan takast opp i retten må det avgjerast kva for domstol som skal føre saka. Aker Biomarine meiner Oslo tingrett er rett domstol.
Ueinige om domstol
Borgarting Lagmannsrett kom 12. mars i år til at Søre Sunnmøre Tingrett i Volda er rette domstol. Rettsaka vart fastsett å starte 20. august i år, og det vart då sett av fem dagar.
Aker Biomarine anka avgjerda i Borgarting Lagmannsrett til Høgsterett, der ankeutvalet kom til at Høgsterett skal behandle anken. Dermed blir det ikkje rettsak i Volda, i alle fall ikkje i denne omgang.
Det var NRK Møre og Romsdal som skreiv om anken først.
Høgsterett vil truleg avgjere plassering av rettsaka i løpet av hausten, noko som gjer at striden om retten til teknologien ombord i Juvel sannsynlegvis først kjem opp i tingretten neste år.
Striden
Striden står om den patenterte krillfabrikken om bord. Røkke fekk hand om trålaren då den var på tvangssal i fjor. Røkke meiner at han også kjøpte krillpatenta. Stig Remøy har svart at desse patenta ikkje er eigd av det konkursramma selskapet Emerald Fishing men av selskapet Rimfrost Technologies. Remøy varsla i fjor rettssak dersom nokon bryt deira patentrettar.
For tida er «Juvel» i havområdet utanfor Uruguay og Argentina, ifølgje nettstaden Marine Traffic. Generelt er det billegare å vere ute i havet enn å ligge ved kai dersom det til dømes blir gjort testar, vedlikehald eller reparasjonar om bord. Krillfelta som det blir tråla i er uansett lenger sør, i Sørishavet.