– Eg var vel ferdig å lese e-posten rundt klokka 14.15 i ettermiddag. Om den hadde kome 45 minutt seinare, hadde det vore for seint. Då var døra låst og eg hadde gått for dagen, seier dagleg leiar Helge Rødseth i Herøyterminalen AS til smp.no måndag kveld.
Selskapet Refa Group AS, som eig hurtigruteterminalen ved Torvik i Herøy, har vore i forhandlingar med Hurtigruten ASA og Herøy kommune om den vidare drifta av terminalen.
Hurtigruten har ikkje vore villige til å akseptere ein avtale som inkluderte berre passasjertrafikk, og ikkje gods, i Torvik.
Held fram drifta inntil vidare
Sist tysdag skreiv lokalavisa Vestlandsnytt at Hurtigruten ASA har tilbode Refa Group høgare betaling for drift av terminalen, men at forhandlingane ikkje hadde ført fram.
Hurtigruten snur - betaler regningene sine
– Men det unngår vi no. Refa kom med eit tilbod om å drive terminalen fram til vi har ein ny avtale. Denne har ikkje blitt akseptert enno, men vi har kome fram til at vi vil halde fram drifta i natt likevel, seier Rødseth.
Nesten krise
– I morgon tidleg skal vi ha eit møte og gå gjennom avtalen med mellom andre fagforeininga, held han fram.
– Kva hadde skjedd om e-posten ikkje hadde kome i ettermiddag?
– Då hadde det ikkje vore nokon på kaia for å ta imot Hurtigruta, og ho kunne dermed ikkje lagt til.
– Men det unngår de no?
– Ja, no har vi fått til eit mellombels opplegg, seier Rødseth.