Fylkesleiar for Kristeleg Folkeparti (KrF) i Møre og Romsdal, og ordførar i Volda, Arild Iversen, er føreslått som medlem av sentralstyret i KrF. Det skriv NRK Møre og Romsdal på sine nettsider.
– Eg er litt overraska over at eg vart føreslått, men eg synest sjølvsagt det er hyggjeleg at andre vurderer det som ei moglegheit, seier Iversen til NRK.
Iversen vart nyleg kåra til den mest populære ordføraren i Møre og Romsdal. Han har vore leiar for fylkespartiet dei siste åra, og vore medlem av landsstyret.
– Eg trur eg kan bidra med viktige innspel i sentralstyret, seier Iversen.
Steinar Reiten, leiar av fylkestingsgruppa for KrF, fortel at det vil verte lobbyverksemd i kulissane for å få Iversen inn i sentralstyret.
– Vi skal kjempe for å få han inn. Iversen er rett mann på rett plass, seier Reiten til NRK.