– Folk køyrer som om dei har stole bilen. Det er skummelt. Eg går mange turar med barnevogn langs vegen og eg har vore ute for fleire hendingar. Det er ikkje trygt å gå her sånn som det er no, seier Eirin Hatlenes Jørgensen.
Ho er busett på Salt og går daglege turar med dottera Eliza på sju månader langs den trafikkerte 60-sona i Moldefjorden.
– Det er nesten sånn at eg får dårleg samvit som mor for at eg utset ho for det når eg går tur. Men vegen skal no vere for oss også, ikkje berre dei som køyrer for fort, seier ho.
Området det er snakk om er fylkesveg 618 rundt Moldefjorden, og kanskje då spesielt området frå Salt og inn til Selje fiskeindustri, litt lenger inn i fjorden
Denne strekka på 1,3 kilometer er nemleg utan gul delelinje, og med rundt femten barn i området er hendingane dei viser til noko som går utover nattesøvnen til foreldra.
– Det er verst her som vegen er smal, og spesielt når det er mykje aktivitet på fiskeindustrien, seier ho.
Når det er sesong køyrer det nemleg rundt 2.500 lastebilar frå anlegget aleine. Om ein legg til alle andre, både lette og tunge køyretøy, er det forståeleg at ho får ein klump i halsen kvar gang ho legg ut på tur.
Måtte hive barnevogna i grøfta
Men sjølv om det er der det er smalast veg ho som oftast har opplevd farlege hendingar, betyr ikkje det at det er trygt der vegen er delt i to køyrefelt heller.
– Eg gjekk på tur lengre inne i fjorden, der det er gul delelinje. Då kom det bil bak meg og ein imot. Eg stoppa og forsikra meg om at han som kom bak meg såg meg og tenkte naturleg nok at han som kom imot meg såg meg også.
Det gjorde han ikkje, trass i at ho hadde på seg synlege kle og barnevogna var oransje.
– Han kom rett mot meg og slakka ikkje ned. Eg måtte hive barnevogna utfor vegen. Heldigvis var vi akkurat ved ei avkøyrsle. Hadde vi ikkje vore det, hadde det vore to meter ned i ei grøft. Men heller det enn at ho hadde blitt påkøyrt, seier ho.
Blir køyrt i staden for å bruke sykkel
Området Moldestad-Salt aleine er i dag heimstaden til rundt femten born i barnehage- og skulealder. I tillegg kjem alle som har tilhøyrsle til området og som er barn og barnebarn av dei som bur der.
Altså ligg mykje til rette for at desse ungane skal kunne ha ein sosial barndom med besøk hit og dit. Men å sleppe ungane aleine sit langt inne for foreldra.
– Det er eigentleg ei fallitterklæring, men vi må altså ta fram bilen kvar gang ungane skal ein plass som det vanlegvis berre hadde tatt nokre få minutt å sykle til, seier Bjørn Villard.
– Vegen er rett og slett ikkje bygd for den trafikken som er her, og då kan ein berre tenke seg korleis det vil bli om det blir noko av Stad skipstunnel og all trafikken arbeidet med den vil kunne føre til, seier han.
Busstopp utan sikt
Villard og familien hans bur like før staden vegen blir breiare, ved fiskeindustrien. Samtidig er denne plassen ein av dei mest utsette, nemleg på ein bakketopp i ein skarp sving der det i tillegg er busstopp for barna som skal til og frå Selje skule.
– Denne svingen er eit kapittel for seg sjølv, seier Villard.
Nabo med Bjørn Villard på den andre sida av vegen, Elisabeth Johansen, deler denne oppfattinga. Her med sonen Colin (11) og dottera Angeline (4).
– Ungane våre må krysse vegen når dei kjem heim frå skulen og Bjørn sine ungar må krysse vegen når dei skal til skulen. Men det er elendig sikt så ein ser ikkje bilane når dei kjem, seier ho.
– Vi både ser og høyrer bilar som bråbremsar når dei kjem rundt svingen, så det er eigentleg eit under at det ikkje har skjedd fleire ulykker.
Politiet har fått beskjed
Det er altså ein kvardag fylt med angst og hjartet i halsen for dei som bur på strekka. Tilsvarande historier kunne sikkert blitt fortalt rundt heile Moldefjorden, men det desse foreldra har opplevd har vore så graverande at dei snart ikkje veit kva dei skal gjere lenger.
Politiet viser liten interesse for situasjonen, hevdar dei.
– Etter hendinga då eg måtte hive barnevogna utfor vegen ringde eg politiet med ein gang og sa kva som hadde skjedd, seier Eirin Hatlenes Jørgensen.
Eirin oppfordra dei sterkt om å legge inn nokre kontrollar for å ta dei som set livet til andre i fare.
– Svaret var at dei skulle ta det til etterretning, men eg har ikkje sett nokon kontroll. Eg trur eg berre kjem på at det har vore kontroll i Moldefjorden éin gang, og det var ein promillekontroll på Berstad for mange år sidan, seier ho.
Gang- og sykkelveg?
Dei tre foreldra vi møter veit ikkje akkurat kva som bør skje vidare i området no etter at dei har valt å fortelje sine historier. Både utbetringar av vegen og gang- og sykkelveg rundt fjorden blir nemnt, men som alle veit er dette prosjekt som tar tid og er kostbare..
Steg éin må då bli at dei som faktisk køyrer der, brukar vit, uansett kva stand vegen er i, meiner dei.
– Den enkle oppfordringa til folk må jo vere at dei må vise omsyn. Sjølv om det er grisgrendt og lite busetnad her så bur her framleis folk, seier Villard.