Det er håp om sol, men det er lurt å ha paraplyen klar dersom du skal feire 17. mai på Vestlandet eller i Nord-Noreg.

– Rundt 17. mai er sannsynet for nedbør størst på Vestlandet, seier meteorolog Magnus Ovhed.

Med ei god veke att til nasjonaldagen, er det framleis knytt uvisse til vêrprognosane.

Den komande veka er det ein god del mild luft som dekkjer mesteparten av landet, men i grensa til den kalde lufta kan det kome ein del nedbør.

Det er på Austlandet, Trøndelag, Finnmarksvidda og Aust-Finnmark det er størst sjanse for «ein passe tørr 17. mai».

Temperaturen på Austlandet ser ut til å bli rundt 15–20 grader. I vest kan temperaturane liggje på 12–15 grader og i nord rundt ti grader.

(©NPK)

Yr melder 14 grader som makstemperatur og overskya i Ålesund på 17. mai. Det blir opphald og opp mot 18 grader i Volda, spår meteorologane. På Vestnes blir det 13 grader og tidvis sol.

I Ulsteinvik er det venta delvis sol og 15 grader.

På Haramsøya blir det opp rundt 10 grader, og sola gløttar fram på ettermiddagen.

Nordfjordeid kan vente seg opp mot 20 grader, og overskya vêr.