Forlaget Bazar og «Foreningen! les» står bak konkurransen «Skriv din drøm». Juryen har vurdert nærare 10.000 tekstar.
Heile tre bidrag frå Myklebust skule i Vanylven var med blant topp 65. Også elevar frå Volda ungdomsskule var med så langt i konkurransen.
Les også: – Pc gir skriveglede
No står 10.-klassingen Maria igjen som ei av dei 15 beste.
Ti vinnarar blir kåra i slutten av april. Premien er lesebrett og profesjonell innlesing av vinnartekstane på lydbok.
Sjølvmord-historie
Maria Vildalen Bjelde skreiv «Sorte kapper eller lyse lokkar», ei historie om sjølvmord.
– Det er draumen om å vere fri eg har skrive om. For hovudpersonen er det døden, seier Maria.
– Ei trist historie?
– Ja. Men det er ikkje min draum det handlar om. Då eg forstod at vi kunne skrive om kva som helst, blei det lett å skrive. Eg prøvde å ta i bruk metaforar og språklege bilete, for det er slikt lærarar liker. Kan hende er det difor min tekst har kome langt i konkurransen. Eg jobba mykje med språket, seier Maria.
Likar best matte og naturfag
– Men eg er overraska over at min tekst framleis er med. Eg er ikkje spesielt flink til å skrive. Eg likar matte og naturfag betre. Men det er kjekt å kome så langt i ein så stor konkurranse, seier ho.
Også Ingeborg Aarø og Rikard Aarvik kom langt i konkurransen, til topp 65.
– Det at det var ein konkurranse har nok inspirert mange til å jobbe ekstra med tekstane. Denne stilen er nok den beste eg har skrive. Eg fekk med mykje symbolikk, seier Ingeborg.
– Eg skreiv om ei tvillingsøster med leukemi. Draumen er at ho får liggje i eit rosehav. Det gjer ho til slutt, når ho døyr, fortel Ingeborg.
– Eg skriv ofte dystre stilar, og får gode tilbakemeldingar. Skriving er kjekt, men helst vil eg bli interiørarkitekt, seier Ingeborg.
Rikard valde eit urealistisk tema:
– Fyrst var skriveoppgåva vanskeleg, til eg forstod at eg kunne skrive heilt fritt. Eg skreiv om ei gruppe ultra-menneske med spesielle evner. Hovudpersonen har ein draum om å vere vanleg i staden, eit medmenneske, seier Rikard.
– Kva er din draum?
– Eg vil bli journalist.
Les flere kulturnyheter på smp.no
Høgt nivå
Pressekontakt Siw Grindaker i Bazar forlag seier juryen er imponert over nivået på mange av tekstane.
– Her er mange spanande unge stemmer, mykje god fantasi og litterære kvalitetar på høgt nivå. Juryen trur dei har lese starten på fleire framtidige forfattarskap, seier Grindaker.