Medan etterspelet av angrepet mot det skeive miljøet i fjor framleis er høgst levande, gjekk PST torsdag ut og opplyste om auke i talet på truslar mot det skeive miljøet. Likevel er det inga endring i trusselnivået før Pride-arrangementa i år.
– No er det veldig mange som gjer veldig mykje for at dette arrangementet skal bli trygt, men garantiar kan vi aldri skrive ut, seier PST-sjef Beate Gangås til NTB.
– Eg vil vurdere å gå i toget, men det kjem an på kva andre ting eg må gjere, mellom anna i dette huset, seier Gangås.
PST ber folk melde frå dersom dei ser mistenkjeleg aktivitet.
Tek alle på alvor
Sjefen for kontraterroravdelinga i PST, Lars Lilleby, sa onsdag at dei hadde registrert ein auke i talet på truslar mot pridemarkeringar over heile landet. Truslane dreier seg om angrep mot arrangement, namngitte enkeltpersonar i pridemiljøet eller generelt mot pridemiljøet.
– Vi har ingen indikasjonar på at den eller dei som har sett fram truslar, har til hensikt å gjennomføre det dei har trua om, seier Lilleby
– Vi tek alle på det største alvor, seier kontraterrorsjef Lars Lilleby.
– Viktig å gjennomføre
Fredag startar Oslo Pride som skal avsluttast med den tradisjonelle paraden laurdag 1. juli. Også fleire andre stader i landet vil det haldast eigne arrangement.
– Vi er inne i Pride-månaden. Det er kanskje akkurat no det er viktig å gjennomføre desse arrangementa, det oppmodar vi til, seier Lilleby om dei kommande dagane.
Han seier PST har god dialog og kommuniserer direkte med politiet om det skulle dukke opp noko. Truslane blir sett fram både på e-post, på nettforum og gjennom klassiske tips som blir ringde inn eller kjem med brev.
Lilleby forklarer korleis PST går fram for å redusere bekymringane knytt til truslane. Andre og meir alvorlege truslar går dei vidare med.
– Vi oppmodar absolutt til å gjennomføre Pride-arrangement som planlagt, seier kontraterrorsjefen.
Tosifra tal
Sjølv om PST er klar på at det var vore ein merkbar auke i omfanget av truslar mot pridearrangement, vil ikkje Lilleby talfeste kor mange.
– Eg vil ikkje seie eksakt kor mange førebyggjande saker vi jobbar med. Men det dreier seg om eit tosifra tal, og ein porsjon knyter seg til Pride, seier Lilleby.
Han stadfestar at fleire kan blir fengsla etter å ha sett fram det PST meiner er truslar mot Pride.
Endringar i PST
Lilleby har også fått ansvaret for å koordinere oppfølginga av 25. juni-rapporten, der Politiets tryggingsteneste (PST) fekk kraftig kritikk for handteringa av masseskytinga i Oslo 25. juni 2022.
Rapporten konkluderte med at angrepet kunne vore forhindra dersom PST hadde oppretta ei førebyggjande sak mot terrorsikta Zaniar Matapour i månadene fram mot angrepet. No varslar Lilleby endringar.
– PST må sjå på måten vi jobba på. Er vi gode nok på å fange opp dei som er i randsona? seier Lilleby.
I staden for berre å undersøkje personar det er bekymring om, skal PST no i større grad identifisere eit mål for terror, eller miljø der terroristar kan tenkjast å inngå, og såg systematisk nøste og leite etter namn, utdjupar Lilleby overfor VG.
(©NPK)