Tre personar var involvert i ei ulukke på riksvei 15 ved Bryggja i Vågsøy. Ei kvinne omkom i ulukka. Kvinna var førar av den eine bilen. Politi, ambulanse, brannvesen og luftambulanse rykte ut til staden like før klokka 10. Samanstøyten skjedde i ei 80-sone.
Den andre bilen hamna på taket. Inne i bilen var det to personar. Begge blei frakta med luftambulanse til sjukehus i Førde og Ålesund. Føraren av bilen, ein mann i 40-åra, blei alvorleg skadd og frakta til Førde sentralsjukehus.
- Mannen er alvorleg skadd, men stabil. Han er nyleg operert og ligg på intensivavdelinga ved Førde sentralsjukehus, opplyser AMK Førde til smp.no.
Passasjeren i denne bilen blei frakta til Ålesund sjukehus. Vedkommande skal ikkje ha livstruande skadar.
Politiet opplyser at alle tre er utanlandske statsborgarar.
- Alle tre budde i Vågsøy kommune, seier Odd Arve Solvåg, operasjonsleiar ved Sogn og Fjordane politidistrikt.
Pårørande er enno ikkje blitt varsla.
- Sidan dei involverte i ulukka er utanlandske, vil det ta lengre tid å få varsla frå, seier Solvåg.
Var ikkje glatt
Det var ikkje is i vegbana der frontkollisjonen skjedde. Ei ulukkesgruppe blei sendt til staden og gjorde undersøkingar der.
- Vi veit ikkje årsaken til ulukka enno. Vi må etterforske ulukka vidare, seier Solvåg.
Riksveg 15 ved Bryggja blei stengd ein periode etter ulukka. Vegen blei opna igjen kl. 15.20.