Farstad Shipping varsla nyleg at dei legg sitt fjerde fartøy i opplag ved Humla i Ålesund. Skipa ligg der no godt synleg både frå Sula-sida og Ålesund-sida.
For eigaren er Humla den mest gunstige plasseringa.
– Plasseringa har med kostnad og sikkerheit å gjere, og at båtane er lett tilgjengeleg for oss, seier finansdirektør Torstein Stavseng i Farstad Shipping.
Far Sigma er berre eit år gammal, fartøyet vart levert frå verftet så seint som i februar i fjor.
Fire godt synlege offshore-fartøy er også noko som folk legg merke til og snakkar om.
– Tilbakespela eg har fått frå folk er at ein skjønar alvoret i situasjonen, når store, nye båtar blir lagt i opplag, seier Stavseng.
Vakthald
Han fortel at det til ei kvar tid er 10 personar om bord for å overvake og for å gjere vedlikehald.
Utsiktene for reiarlaga er framleis prega av stor usikkerheit med tanke på konsekvensane av oljeprisfallet og aktivitets- og kostnadskutt på sokkelen.
– Vi følgjer utviklinga nøye med tanke på om vi skal legge ytterlegare skip i opplag, seier Stavseng.
Førre gong Farstad hadde båtar i opplag var for rundt 10 år sidan, men det var ein gammal båt som skulle ut av marknaden. Også den låg ved Humla. På slutten av 80-talet hadde Farstad båtar liggande på Flatholmen, på baksida av Ålesund. – Då var det dette som var den mest hensiktsmessige plassen, seier Stavseng.
To forsyningsskip
Island Offshore varsla måndag at dei legg dei to PSV-ane Island Duke og Island Duchess i opplag på ubestemt tid.
Opplag av fartøya skuldast ein vedvarande svak marknadssituasjon, spesielt i Nordsjøen men også i andre marknader. Per i dag er det betydeleg overkapasitet av slik tonnasje i Nordsjøen, skriv selskapet i ei pressemelding måndag føremiddag.
– Utsikter til eit lågare aktivitetsnivå i 2015 og 2016 tilseier at situasjonen kan vare med mindre reiarlaga tek ansvar for å redusere tilbodet av fartøy. Ei omstilling er nødvendig for å opprette balanse i marknaden, seier administrerande direktør Håvard Ulstein i Island Offshore Management AS.
Opplag av fartøya får ingen konsekvensar for mannskapet på kort sikt då desse blir tilbydd arbeid på andre fartøy i flåten, opplyser selskapet.
– Island Constructor er framleis i opplag fram til byrjinga av mars. Vi har ikkje andre skip i opplag per i dag, seier kommunikasjonssjef Marianne Hovden i Island Offshore.
Halde det gåande
Bourbon Offshore varsla i januar permittering for mannskapet på forsyningsskipet Bourbon Rainbow. Men før mannskapet gjekk ut i permisjon fekk båten ny kontrakt. Etter nokre få dagar ved kai på Mjølstadneset i Herøy bar det dermed ut igjen.
No varslar Bourbon permittering av ein ny båt. Konstruksjonsskipet Bourbon Pearl, som opererer i Middelhavet, går etter planen i opplag i nær framtid.
– Vi har sendt ut permitteringsvarsel for Bourbon Pearl. Situasjonen blir fortløpande vurdert. Fleire av skipa går på spotkontraktar, der det er om å gjere å halde det gåande, seier adm.dir. Bjørn Remøy.
Offshore-reiarlaga har den siste tida budd seg på eit utfordrande år, og jublar samtidig over at det nyleg er gitt nye konsesjonar på sokkelen.