Herøy på topp - Ålesund på botn

Mandag føremiddag har Herøy kome på topp over kor mykje som er gitt til TV-aksjonen på Nordvestlandet. Ålesund ligg heilt ned på 420. plass i landet.

Bak f.v.: Bjørn Leinebø, Therese Haugen, Anne Britt Kvalsvik og Erhard Hermansen. Framme f.v.: Tanja S. Leikanger, Britt Paulsen og Ordførar Arnulf Goksøyr. Desse er også med i komiteen men var ikkje tilstade når bildet vart teke: Martin Endresen, Unni Elise Jøsokbakke, Marit Sævik Leinebø, Berit Skjelsvik og Olaug Andreassen.

Årets TV-aksjon til Kirkens Nødhjelp og reint vatn til over ein million menneske i åtteland har gitt givarrekord. Mandag føremiddag har ein kome opp i tett på 240 innsamla millionar kroner.

Herøy i tet

På Nordvestlandet er det Herøyværingane som har gitt mest i snitt. Dei har i gjennomsnitt gitt tett på 75 kroner per innbyggar.

Laurdag føremiddag hadde Kirkens Nødhjelp og den lokale innsamlingsaksjonen storopplegg i Fosnavåg sentrum med mellom anna sal av sild, kapproing og vassbering.

Politikaren knekte åra

Gir sild til TV-aksjonen

Men sjølv med 75 kroner per innbyggar, er det langt opp til toppkommunane i landssamanheng. På Svalbard ligg gjennomsnitt på 366 kroner og i Utsira i Rogaland er også snittet på over 300 kroner.

Ålesund på botn

I botn er det derimot ein kommune frå Nordvestlandet som "ligg godt an". Av landets om lag 430 kommunar, ligg Ålesund på 420. plass med ein snitt på vel 35 kroner per innbyggar.

I Møre og Romsdal ligg Rauma på topp med vel 95 kroner per innbyggar. På andreplass kjem Rindal (89,44 kroner) og Tingvoll på tredjeplass (75,44) kroner før Herøy kjem inn på fjerdeplassen i fylket.