Advent er ei fin tid. Folk pyntar hus og heim med stjerner og lys som gjev mykje hygge og atmosfære no når vi berre har dagslys i nokre få timar. Dei som bur på Kjølås i Stranda har i fleire år gått saman og gjort ein ekstra innsats for å skape julestemning. Ta deg ein tur dit ein kveldsstund om du vil sjå noko vakkert!
Men jula handlar om meir enn lys, nissar, mat og gåver – og alt det andre som dominerer i desember. Det er ein religiøs høgtid som vi her i landet har feira i meir enn tusen år. Av den grunn er det viktig at barna får eit innblikk i kyrkja sitt liv og meir kunnskap om ein viktig del av den norske kulturarven.
I to år har pandemien vore eit hinder for å invitere skulebarn til gudsteneste før jul. Derfor er eg glad for at kyrkja igjen kan gi dette tilbodet til alle grunnskulane i Stranda kommune, og har von om at det same gjeld i alle andre kommunar i fylket. Eg er overtydd om at skulane tek imot invitasjonen med glede.
Åpner for alternativ julefeiring i kirkene
Deltaking i ein julegudsteneste er ein naturleg del av undervisninga i dei verdiane det norske samfunnet bygger på. Å lære om trusliv og seremoniar bør vere ein del av dette. Det har ikkje vorte mindre viktig i eit fleirkulturelt samfunn. Vi skal møte andre sine livssyn med respekt. Då er det ein stor føremon å kjenne vår eigen kulturarv.
I 2016 var det debatt om skulegudstenestene på Stortinget. Dåverande statsminister Erna Solberg var tydeleg på at ingen elevar skal verte pålagd å delta viss dei føresette ikkje ynskjer det. Men ho la til at «det blir rart om vi skal tilpasse oss så mye at vi unnlater å ta med den viktigste delen av hvorfor vi feirer jul». Det er eg samd i. Mister vi dette bandet er det eit brot med vår historie og identitet.
Skolen snudde – det blir likevel julegudsteneste
Dei som har eit anna syn, og ikkje vil at barna deira skal vere med i kyrkja, skal møtast med respekt. Det er skulen si oppgåve å syte for at dei har eit godt alternativ. Skulen skal ikkje drive forkynning, men heller ikkje gøyme bort det religiøse.
Alle i kyrkja og på skulane som tek del i førebuing og gjennomføring av skulegudstenester og alternative opplegg, fortener takk for arbeidet dei legg ned. Skulegudstenesta før jul er ein god og meiningsfull tradisjon.