Regjeringa sine investeringar i samferdsel blir ingen fest for Nordvestlandet. Møre og Romsdal og tidlegare Sogn og Fjordane ser ut til å bli ståande att som taparar i kampen om vegmilliardane.
Igjen – og det er det som er alvorleg.
Den som taper kampen om å byggje ny infrastruktur, taper utviklingskraft og risikerer ei sakte utarming og tap av attraktivitet. Slik blir nye utkantar skapt.
Lekkasjer fra NTP: Møre og Romsdal soleklar taper
Nasjonal transportplan (NTP) kjem først fredag. Vi veit likevel alt ein god del om kva vi er i vente. Det er smått, men ikkje godt.
Politikarar frå regjeringspartia, med samferdselsminister Jon-Ivar Nygård (Ap) i spissen, har strødd om seg med godbitar i ein nasjonal salsturné dei siste to vekene.
For å seie det slik: Godteriet er ikkje likt fordelt.
– Ny Strynefjellstunnel skal stå ferdig innan 12 år
Vinnaren blir Østfold, statstråden sitt heimfylke. Her landar minst 50 milliardar til jernbane og veg. Bergens-regionen, Rogaland, Trøndelag og Nordland kan også koste på seg litt jubel.
Nordvestlandet får småmynt.
Vi får nytt Veibustkryss (E39) i Ålesund til 170 millionar. Ny veg på strekninga Astad Bjerkeset (E39) forbi Batnfjorden til 1,2 milliardar kan også få byggestart om ikkje altfor mange år. Begge ligg inne i planen i første seksårsperiode.
I tillegg kjem det meir til drift og vedlikehald av fylkesvegar, rundt 100 millionar årleg til Møre og Romsdal. Strynefjellsvegen får etterlengta kroner til planlegging, men bygging er i det blå.
Resten er glasperler.
Klarer Regjeringen å bestå NTP-eksamen?
Tunnelen frå Volda til Furene (E39) er eit gryteklart prosjekt som berre manglar eit bompengevedtak i Stortinget. No har det bytta plass med Batnfjorden, og er skubba ut i siste seksårsperiode. Leiaren i transportkomiteen, Sigbjørn Gjelsvik (Sp), seier at prosjektet er «fullfinansiert».
Det grensar nesten til å vere frekt. I realiteten er dette nemleg ei utsetjing.
Prosjekt i siste halvdel av ein planperiode utan ein finansieringsplan står berre med ein kølapp, utan å vite nummeret eller ha garanti om å få sleppe inn i varmen. Volda må leve med E39 gjennom tjukkaste sentrum, og all sentrumsutvikling blir liggjande i fryseboksa.
– No legg vi til rette for at Voldatunnelen skal realiserast
Ikkje overraskande blir Møreaksen (E39) også skubba ut i kulden. Strekninga frå Moa til Vegsundet (E39) reiste Gjelsvik og resten av salskorpset stille forbi. Stad Skipstunnel lever på nåde, heilt avhengig av korleis det går med den planlagde anbodsrunden seinare i år.
Fasit etter at ny veg mellom Molde og Hjelset blir opna i år, blir altså at ny innfartsveg til Ålesund blir einaste større statlege prosjektet under bygging i nordvest. Det er nesten fullt ut finansiert av bompengar. Så kan vi håpe på skotsalvar i Batnfjorden, ved Stad og på Veibust og at Nye Veier kjem i gang på E136 på Veblungsnes neste år.
That’s all Folks!