Når gamle hus blir rivne mister vi viktige bitar av denne felles historia – og det som gir lokalmiljøet særpreg.

Vi i Fortidsminneforeininga Sunnmøre lokallag er opptekne av, og bryr oss om våre historiske omgjevnadar og lokal byggeskikk som bidrar til at stader blir opplevd forskjellige frå kvarandre, og på denne måten blir attkjennelege. Det betyr noko for oss korleis det ser ut der vi bor og ferdast. Det betyr noko korleis lokalsamfunn, tettstader og byar blir forma og endra. Det betyr noko kva vi tar med oss vidare, og kva vi kvittar oss med.

Snart er det kommune- og fylkestingsval. Vi skal velje kva politikarar som skal styre utviklinga der vi bor dei neste fire åra. Avgjerdene dei tar varer likevel lengre. Gjennom plan- og byggesaker former kommunepolitikarane våre omgjevnadane for tiår og hundreår framover.

Loven slår fast at det er eit felles ansvar korleis omgjevnadane ser ut; når nokre vil bygge eller rive vedkjem det fleire enn berre eigar. Dei fleste vedtak som påverkar stadene våre blir tatt av lokalpolitikarane.

Samtidig veit vi at det først og fremst er gode og ansvarsbevisste eigarar som sikrar bygningsarven. Lokalpolitikarane kan gjere mykje for at det skal vere enklare for private å ta vare på kulturminne. Kommunen kan vedta fritak for eigedomsskatt på verna hus, den kan bidra til etablering av bygningsvernsentra, sikre at det er fagfolk med kulturminnekunnskap i administrasjonen og ikkje minst: følgje eigne vedtekne planar!

Politikarane kan avstå frå dispensasjonar når utbyggjarar og eigarar presser på. Dei kan stille krav til utforminga av nybygg. Dei kan krevje tilpassing til eksisterande bygningsmiljø. Og dei kan sikre at den tradisjonelle busetnaden som finst blir tatt vare på og blir halden i stand.

Det finst døme i alle kommunar på spesielle hus og bygningsmiljø som er med og gir bumiljøa på Sunnmøre særpreg. Gamle naustområde, landbruksmiljø, tette bustadmiljø, og dei såkalla Schmidt-husa som ligg spreidd rundt ikring – bustadhus og næringsbygg i mur som vart sette opp frå 1905 -1950, og som er særmerkte for Sunnmøre.

Bevaring og vidare bruk av eldre bygg er berekraftig. I dei aller fleste tilfella er vidare bruk av eit hus eit langt betre klima- og miljøtiltak enn å rive for å bygge nytt. Lokalpolitikarane har makt til å styre både mengda klimautslepp frå nybygg og mengda byggavfall.

Dersom du er opptatt av å ta vare på lokal historie og identitet, må du vite kva politikarane meiner om bevaring. Utfordre politikarane på kva dei meiner om kulturminnevern og stadutvikling.