«Det er inga skam å snu», heiter det i ein viktig fjellvettregel. Og den regelen kan godt nyttast andre stader enn på fjellet, f.eks. på ein haug som t.d. Kongshaugen (kjend som Kvasnes).

Det er enorme kostnader som er førespegla vil komme med nytt reinseanlegg på Kvasnes.

I Sunnfjord har dei modige politikarar som har valt å prøve reinseløysinga Hellesnes og Renasys har utvikla, og erfaringane er positive. Løysinga gir mogelegheit for å oppgradere eksisterande anlegg gjennom ei modulbasert løysing. Med ei slik løysing kan ein tilpasse, prioritere område, bygge delvis og slik spreie kostnadane.

Ein modulbasert løysing blir billigare og meir skånsamt for miljø, og ikkje minst, med den nye metoden kan ein og reinse andre stader i kommunen der kloakken (med Kvasnes) vil vere eit like stort problem som før. For målet må vel vere å reinse all kloakken i kommunen?

At ein ikkje veit den eksakte prislappen enno, bør ikkje sette ein stoppar for arbeid vidare med denne eller liknande løysingar. «Dagleg leiar seier dei (Renasys) er klare til å levere ei mykje rimelegare løysing, men kan ikkje vere konkret på pris.» Kvasnes veit ein vel heller ikkje den konkrete prislappen på? Eit prosjekt som i utgangspunktet skulle koste 178 millionar er no opp i 2,1 milliardar kroner!

Sula-ordførar Jim Arve Røssevoll seier Renasys er velkommen til å levere eit tilbod under anbodskonkurransen. Men kan han svare på om anbodskonkurransen vil bli forma ut slik at den opnar for heilt andre løysingar?

Politikarane bør føle seg forplikta til å senke kostnadane, men og til å følge opp uttalte mål om sirkulær tankegang og klimabudsjettet. Med Renasys si løysing blir kloakk til ein ressurs med verdi. Det tørka slammet kan nyttast til dømes til jordforbetring eller karbonlagring; dette vil slå svært positivt ut på Ålesund og Sula kommune sine klimabudsjett, samtidig som det kan gi inntekt til kommunen ved sal, og vere ei løysing i ei verd der kunstgjødsel blir ei mangelvare.

Og i samband med miljøet, så vil eit fjellanlegg på Kvasneset medføre utskyting av enorme mengder steinmassar. Desse skal igjen over på lekter og miljøaspektet vil variere kraftig med kor langt dette skal fraktast; det er det vel ikkje svar på? Overføringsleidningane både til sjøs og til land i tettbygd strøk og på grunt vatn, veit ein kostnad eller miljøpåverking av dette?

Eg ser fram til å høyre kva «den digitale tvillingen» i framtidslabben seier om disse heilt ulike løysingane, for den jobbar vel med dette no? Skal Ålesund bli ein «Smart Sirkulær By» som det er sagt, så finst det vel knapt eit betre prosjekt å starte med.

Målet til Ålesund kommune er å bygge ein attraktiv byregion. Kjære politikarar; tenk kor attraktivt det er med galopperande avgifter for innbyggjarane no. Ver modig og sats på kostnadseffektive, innovative og framtidige løysingar: av og til er det ei stor skam å ikkje snu!